حدیث کی اقسام مع تعریفات

حدیث کی اقسام مع تعریفات
مرتب: افتخار الحسن رضوی
علماء کرام تو واقفیت رکھتے ہیں کہ حدیث کیا ہے، اور اس کی کتنی اقسام ہیں، لیکن سوشل میڈیا پر  ہر جاننے والا اور نہ جاننے والا ایک دوسرے سے الجھتا ہے کہ یہ حدیث صحیح ہے فلاں ضعیف ہے وغیرہ۔ در اصل یہ غیر ذمہ دارانہ رویہ ہے، ہمیں صرف اسی موضوع یا عنوان پر بات کرنی چاہیے جس پر ہمیں دسترس حاصل ہو۔ ایک عام مسلمان کو فنی، تکنیکی اور مخصوص عنوان پر گفتگو سے اجتناب برتنا ہی بہتر ہے، پھر حدیث شریف جیسا اہم عنوان  مزید حساسیت کا حامل ہے۔ ہم میں سے کسی کو بھی یہ اختیار حاصل نہیں کہ ہم رسول اللہ ﷺ سے منسوب درست کلام کو ضعیف، اور متروک یا  ضعیف روایت کو صحیح قرار دیں۔ اس لیے قارئین کرام سے گزارش ہے کہ اس طرح کے اہم  اور حساس معاملات پیش اۤنے کی صورت میں اچھے علماء سے رابطہ فرمایا کریں۔ ذیل میں حدیث پینتیس (35) اقسام مع تعریفات پیش خدمت ہیں۔ پڑھیے یاد کیجیے، سمجھیے اور دوسروں تک بھی پہنچائیے۔ جزاکم اللہ خیرا

(ا)مرفوع: وہ حدیث جسکی اسناد نبی صلی اللہ علیہ وسلم  تک پہنچے اور صحابی کہے نبی کریم نے فرمایا۔
(۲)موقوف: وہ حدیث جسکی اسناد صحابی تک پہنچے جیسے راوی کہے کہ فلاں صحابی نے یہ فرمایا۔
(۳)مقطوع: وہ حدیث جسکی اسناد تابعی تک پہنچے جیسے امام اعظم فرمائیں کہ صحابی نے فرمایا۔
(۴)اثر: وہ حدیث جو کسی طریقے سے حضور سے منقول ہو۔
(۵)خبر: وہ حدیث جس میں نبی کریم صحابہ اور تابعین سے روایت ہو اور تاریخی واقعہ ہو۔
(۶)حدیث: وہ کلام جسکی روایت نبی کریم یا  صحابہ یا تابعین سے ہو اور کسی عمل کا ذکر ہو۔
(۷)مرسل: وہ حدیث جسکی اسناد میں صحابی کا ذکر رہ جائے تابعی کہے یہ حضور نے فرمایا۔
(۸)معطّل: وہ حدیث جسکی اسناد کے درمیان سے دو یا تین راوی رہ جائیں۔
(۹)منقطع: وہ حدیث جسکی اسناد میں چند جگہ سے ایک ایک یا زیادہ راوی رہ جائیں۔
(۱۰)مدلّس: وہ حدیث جس کا راوی اپنے اس شیخ کا ذکر نہ کرے جس سے اس نے حدیث سنی بلکہ اس کے اوپر کے راوی کا نام لے۔
(۱۱)مضطرب: وہ حدیث جس کے متن یا اسناد میں راویوں کی کمی زیادتی ہو یا آگے پیچھے ذکر ہو یاتبدیلی ہو جائے۔
(۱۲)عنعنہ: وہ حدیث جس کو صرف  عَنْ سے روایت کیا جائے۔
(۱۳)شاذ: وہ حدیث جس کا راوی غیر معروف ہو اور ثقہ راویوں کی روایت کے مخالف روایت ہو۔
(۱۴)مردود: وہ حدیث جس کے تمام راوی ثقہ نہ ہوں۔
(۱۵)محفوظ: وہ حدیث جس کے سارے راوی ثقہ ہوں مگر اس کے مقابل ثقہ حدیث ہو لیکن ترجیح اس ثقہ حدیث کو ہو۔
(۱۶)معلل: وہ حدیث جس کی صحت میں بہت سے گہرے اور ہلکے اسباب اور علتیں ہوں۔
(۱۷)متابعًا: وہ حدیث جس کا راوی کسی دوسرے راوی کی حدیث کی مطابقت کرے۔
(۱۸)حسن: وہ حدیث جس کے راوی میں ضبط بالکل نہ ہو۔
(۱۹)ضعیف: وہ حدیث جس کے راوی میں نہ عدل ہو نہ ضبط اور صحیح حدیث کی کوئی شرط اس میں نہ ہو۔
(۲۰)متروک: وہ حدیث  جس  کےراوی پر دنیاوی کلام میں عام جھوٹ بولنے کا اتہام لگا ہو مگر روایت حدیث میں اس کا جھوٹ ثابت نہ ہو۔
(۲۱)موضوع: وہ حدیث جس کے راوی کا جھوٹ اکثر حدیث کی روایت میں ہوتا ہو یا راوی خود اقرار کر ے یا قرینوں سے معلوم ہو۔
(۲۲)مبہم: وہ حدیث جس کے راوی کا نام اور اس کی  ذات اس کے حالات اس کا ثقہ ہونا معلوم نہ ہوسکے۔
(۲۳)غریب: وہ حدیث صحیح جس کا ایک راوی مشہور ہو۔
(۲۴)عزیز: وہ صحیح حدیث جس کے دو  راوی معلوم ہوں۔
(۲۵)مشہور: وہ حدیث جس کے بہت سے راوی معلوم ہوں۔
(۲۶)متواتر: وہ حدیث جس کے اتنے زیادہ راوی ہوں نبی پاک کے زمانہ سے لیکر آج تک جن کو جھوٹا نہ کہا جاسکے۔
(۲۷)متّصل: وہ حدیث جس کا راوی سند کے درمیان میں سے رہ نہ جائے۔
(۲۸)معلقًا: وہ حدیث جس کی سند کے شروع میں سے کوئی راوی رہ گیا ہو۔
(۲۹)مدرج: وہ حدیث جس کا راوی اپنے یا اپنے غیر کے کلام کو صحابی یا تابعی کی طرف سے درج کردے کسی غرض کے لیے۔
(۳۰)حسن ذاتی: وہ حدیث جس کے راوی میں ضبط بالکل نہ پایا جائے۔
(۳۱)حسن لغیرہ: وہ ضعیف حدیث جس کے روایت کے راستے بہت سے ہوں اور اس کا ضعف ضروری ہو۔
(۳۲)صحیح: وہ حدیث جس کا راوی مکمل عدل اور ضبط اور یاد داشت والا ہو اس کی دو قسمیں ہیں۔
(۳۳)صحیح لذاتہ: وہ حدیث جس کا عدل اور ضبط کمال طور پر راوی میں موجود ہو۔
(۳۴)صحیح لغیرہ: وہ حدیث جس کے راوی کا عدل اور ضبط کمزور ہو۔
(۳۵)مختلط: وہ حدیث جس کے راوی کا حافظہ بڑھاپے یا نابینا ہونے یا اس کی کتابیں گم ہونے کی وجہ سے کمزور پڑ جائے۔
#Hadith #IHRizvi